Louis Washkansky (1913 – 21 Desember 1967) het die wêreld se eerste menslike hartoorplanting ondergaan.
Washkansky was 'n Litause Jood wat in 1922, toe hy nege was, saam met sy familie na Suid-Afrika geïmmigreer het. Hy was 'n groentehandelaar in Kaapstad. Washkansky het diens gedoen gedurende die Tweede Wêreldoorlog in Oos- en Noord-Afrika sowel as Italië. Na die oorlog trou hy met sy vrou Ann.
Washkansky was 'n geesdriftige sportman. Hy het deelgeneem aan sokker, swem en gewigoptel. Later in sy lewe het sy gesondheid agteruitgegaan. Hy was 'n diabeet en het aan ernstige hartversaking begin ly. Hy het drie hartaanvalle gehad.
Washkansky ondergaan 'n hartoorplanting op 3 Desember 1967 in die Groote Schuur-hospitaal in Kaapstad. Die skenker was Denise Darvall, wat in 'n motorongeluk gesterf het. Die hartoorplanting is onderneem deur dr Chris Barnard en sy hartspan. Die operasie was 'n sukses maar Washkansky het 'n verswakte immuunstelsel gehad en sterf aan dubbele longontsteking agtien dae na die oorplanting.